Бөлүмдөр
Жекшемби, 25-август
Жалал-Абад облусу, Кербен 25.06.2019 15:50 На русском

Жалал-Абадда депутат, мурдагы төрага майып адамды сабаганбы?

Иллюстрациялык сүрөт
Иллюстрациялык сүрөт

Turmush -  Аксы районунун Кашка-Суу айыл өкмөтүндөгү «Падыша-Ата» мамлекеттик коругунда жаңжал чыгып, 2-топтогу майып Тажимамат Алымкулов милицияга токмоктолгонун айтып кайрылды. Т.Алымкулов аны Кербен шаардык кеңешинин депутаты ур-тепкиге алганын аймактык кабарчыга билдирди.

Анын айтымында, окуя 22-июнь күнү болгон.

«Мен 22-июнь күнү Өзбекстандан келген коноктор менен бирге "Падыша-Ата" коругуна эс алганы баргам. Ак-Сай деген жерде жайгашкан эс алуучу жайга жайгаштык. Ал жер Кербен шаардык кеңешинин депутаты К.Б. деген адамга таандык экен. Кечки саат 16:00 чамасында бут кийимимди таппай калдым. Ал жерди иштеткен Иса деген балага бут кийимим жок экенин айтып кайрылдым. Алар билбей турганын айтты. Кийин карасам бут кийимим баштыкчама салынып калыптыр. Мен бут кийимимди тапканымды айтсам (Иса) "кайра, кайра келесиң" деп уруп жиберди. К.Б. дагы ошол жерде экен. Экөөлөп уруп салышты. Мен 2-топтогу майып болгондуктан эч нерсеге чамам жеткен жок. Бетим жарылып, мурдум канады. Ал жерде автоунаа жок болгондуктан ооруканага бара алган жокпуз. 1 күн ошол жерде калууга туура келди. Депутат бизди "милицияга арыздансаңар, өзүңөр камаласыңар" деп коркутту. Өзбекстандан келген коноктор 3 күн эс алышмак, бирок 1 күндөн кийин кетүүгө аргасыз болушту», - деди Т.Алымкулов.

Аксы аймактык ооруканасынын башкы дарыгеринин орун басары Кылыч Буланбеков учурда ооруканада дарыланып жаткан Т.Алымкуловдун абалы орто экенин билдирди.

«Ал кандай жаракат алгандыгы боюнча текшерүү жүрүп жатат. Экспертизадан кийин белгилүү болот», - деди ал.

Сөз болуп жаткан К.Б. шаардык кеңештин мурдагы чакырылышынын төрагасы болгон. 2016-жылы декабрь айындагы шайлоодо депутат болуп келген. Учурда ал маалымат берүүдөн баш тартты.

Ал эми Кербен шаардык кеңешинин учурдагы төрагасы Нурбек Шадыбеков депутаттын мушташканы жөнүндө укпаганын билдирди.

«Ал андай жолго барбаса керек. Жашы улуу эле киши. Эгер милиция тергеп жатса, аягына чыкса керек. Азырынча эч нерсе дей албайм», - деди Н.Шадыбеков.

Жалал-Абад облустук ички иштер башкармалыгынын басма сөз кызматы аталган факт боюнча арыз катталганын билдирди. Алардын маалыматына караганда, милицияга 23-июнь күнү Аксы аймактык ооруканасынан маалымат келип түшкөн. Ооруканага ыкчам тергөө тобу барып, жабырлануучунун арызын кабыл алган.

«Тажимамат Алымкулов 1956-жылы туулган. Учурда бул иш сотко чейинки өндүрүшкө алынып, текшерүү жүрүп жатат», - деп айтылат билдирүүдө.

Буга чейин Кербен шаардык кеңешинин депутаты Ыманалы Сариев сабалган. Кийин депутат аны сабагандарды кечирип, иш өндүрүштөн кыскарган.

Кербен шаардык кеңешинде 5 партиядан келген жалпы 31 депутат бар.

Маалымат катары:

«Падыша-Ата» мамлекеттик коругунда арча токойлорун, республиканын Кызыл китебине киргизилген Семенов ак карагайын, андан башка биотүрдүүлүктү коргоп жана сактап калуу максатында 30 миң 556,4 га жер аянты корукка алынган. Корукта сүт эмүүчү жаныбарлардын 30 түрү, канааттуулардын 51 түрү, өсүмдүктөрдүн 800дөй түрү, анын ичинен Кызыл китепке кирген жаныбарлардын 3, канаттуулардын 4, өсүмдүктөрдүн 8 түрү, ал эми дары чөптөрдүн 22 түрү бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×